ជា សេរីរដ្ឋ

ជា សេរីរដ្ឋ (កើតឆ្នាំ ១៩៩០ នៅខេត្តបាត់ដំបង) បានបញ្ចប់​ការ​សិក្សាផ្នែកគំនូរនៅអង្គការ ហ្វាពន្លឺ​សិល្បៈ នៅឆ្នាំ ២០០៥។ ក្នុងឆ្នាំ ២០០៨ គាត់បានចូលរួមសិក្ខាសាលាមួយជាមួយសិល្បករ អន្តរជាតិ Sera Ing និងសិល្បករ វ៉ាន់ ណាត ក្រោមប្រធានបទ «ការចងចាំរបបខ្មែរក្រហមនៅកម្ពុជា» ដឹកនាំដោយ លោកស្រី Soko Phay-Vakalis នៅមជ្ឈមណ្ឌលបុប្ផាណានៅភ្នំពេញ។

បន្ទាប់ពីបានបញ្ចប់ការសិក្សានៅ វិទ្យាស្ថានបច្ចេកវិទ្យា ក្រុងបាត់ដំបងនៅឆ្នាំ ២០១២ លោកបានចាប់ផ្តើមធ្វើការជាអ្នករចនាក្រាហ្វិច និងវិចិត្រករ នៅស្ទូឌីយ៉ូសន្លឹកថ្មីនៃអង្គការហ្វាពន្លឺសិល្បៈ។ នៅឆ្នាំ ២០១៣ គាត់បានក្លាយជាគ្រូបង្រៀនផ្នែក រចនាក្រាហ្វិចនៅអង្គការ ហ្វាពន្លឺសិល្បៈ។​ ផ្ទាំងគំនូររបស់គាត់ទាក់ទងនឹងការចងចាំ ប្រវត្តិសាស្រ្ត បញ្ហា​មនុស្ស សង្គម នៅតាមសហគមន៍ជនបទ ​និង​ប្រជាជននៅក្នុងប្រទេសរបស់គាត់ដែលតែងតែធ្វេសប្រហែស នឹង​បរិស្ថាន។ ស្នាដៃ​របស់គាត់​តែង​មានជំនក់លើ​ការ​ប្រើ​កំទេច​រណារ អាគ្រីលីក ជា​មួយ​នឹង​ដីភក់ដែល​បង្ហាញនូវរូបរាង​ បង្កើតជា​ជំនោរនៅលើកន្ទេលដោយ​ការ​ប្រើដៃរបស់​គាត់។

គាត់ធ្លាប់បានចូលរួមការតាំងពិព័រណ៍សិល្បៈជាច្រើនដូចជា នៅឆ្នាំ ២០១៤ គាត់បានចូលរួមកម្មពិធី សិល្បៈអន្ដរជាតិតែមួយគត់សម្រាប់សិល្បករដែលមានអាយុក្រោម ៣០ឆ្នាំ នៅអាស៊ីអាគ្នេយ៍ ឈ្មោះថា SPOT ART នៅប្រទេសសិង្ហបុរី។ ក្នុងឆ្នាំដដែល លោកបានធ្វើពិព័រណ៍សិល្បៈទោលមួយដែលមានចំណងជើងថា «គ្រោះមហន្តរាយ» នៅវិចិត្រសាលរមៀត នៅភ្នំពេញ ហើយនៅឆ្នាំ ២០១៩ គាត់បានបង្ហាញពិព៍រណ៍ទោល មួយទៀតដែលមានចំណងជើងថា «​ស្រែប្រតិដ្ឋ​»​​​ នៅឯវិចិត្រសាលសង្កែ នៅខេត្តបាត់ដំបង​ និងនៅ គម្រោងសិល្បៈស-ស នៅភ្នំពេញ។