ម៉ិច ជូឡាយ

ម៉ិច​ ជូឡាយ (កើតឆ្នាំ​១៩៩២ ខេត្ត​កណ្តាល) រស់នៅ និង​ធ្វើ​ការ​នៅទីក្រុង​ភ្នំពេញ ប្រ​ទេ​ស​កម្ពុជា។ គាត់គឺ​ជា​សិល្បករ ផលិតករ​ភាពយន្ត​ឯកសារ និងជា​អ្នក​កាសែត​ឯករាជ្យ​ឲ្យ​ស្ថាប័ន​ព័ត៌មាន សំឡេងប្រជាធិប្បតេយ្យ។ គាត់​មាន​ជំនក់ចិត្ត​លើការ​ផលិត​ស្នាដៃ​ដែល​មាន​ទំនាក់ទំនងនឹង​បរិស្ថាន និងសិទ្ធិរបស់​សត្វ ហើយ​គាត់​ក៏មាន​ចំណាប់អារម្មណ៍អំពី​រឿងរ៉ាវរបស់មនុស្សផងដែរ។ គាត់ក៏បានជួយនៅក្នុងអត្ថបទមួយនៅដើមឆ្នាំ ២០២០ អំពីមណ្ឌលសុខភាពផ្លូវចិត្តកម្ពុជាសម្រាប់ វ៉ាស៊ីនតោនប៉ុស្តិ៍។ កាលពីដើមឆ្នាំនេះ គាត់បានបង្ហាញពីស្នាដៃដ៏ពិសេសអស្ចារ្យមួយ ស្តីពីការផ្លាស់ប្តូរជីវិតរបស់សហគមន៍នេសាទ នៅក្នុងភូមិអណ្តែតទឹកជុំវិញ បឹងទន្លេសាបដែលជាប្រព័ន្ធបឹង និងទន្លេធំជាងគេរបស់ប្រទេសកម្ពុជា។

គាត់ក៏មានប្រវត្តិខាងផ្នែកថតរូប និងផលិតវីដេអូផងដែរ។ គាត់បានតាំងពិព័រណ៍រូបថត និងបានបញ្ចប់ការបណ្តុះបណ្តាលរយៈពេលមួយឆ្នាំក្នុងការផលិតភាពយន្តឯកសារនៅ មជ្ឈមណ្ឌលធនធានសោតទស្សន៍ បុប្ផាណា ទៅលើការដឹកនាំរឿងខ្លី “ផ្ទះរបស់ខ្ញុំ” អំពីការអភិរក្សដំរី នៅខេត្តមណ្ឌលគិរី។ នៅឆ្នាំ ២០២០ គាត់បានទទួលពានរង្វាន់ពី ជំនាន់នៃភាពច្នៃប្រឌិតជំនាន់ទី ​៣។ នៅឆ្នាំបន្ទាប់ គាត់ទទួលបានពានរង្វាន់បី គឺទី ១ ពីមហោស្រពរូបថតអង្គរ នៅកម្ពុជា, ទី ២ ពី ពលរដ្ឋចូលរួមក្នុងយុត្តិធម៌បរិស្ថានសម្រាប់ទាំងអស់គ្នា (CEEJA), និងទី៣​ ពី SUMERNET សម្រាប់ប្រព័ន្ធផ្សព្វផ្សាយ – ដៃគូស្រាវជ្រាវសម្រាប់របាយការណ៍បរិស្ថាន។

ការតាំងពិព័រណ៍របស់គាត់រួមមាន “ទន្លេមេគង្គ គឺមានពណ៌ខៀវ និងស្ងួតហួតហែង”,​ នៅ Sea Junction, BACC, Bangkok, 2021; មហោស្រព TERATOTERA, មហោស្រពបែបគេហទំព័រ, ប្រទេសជប៉ុន; ធាតុ, គម្រោងសិល្បៈស-ស, ភ្នំពេញ, ឆ្នាំ ២០២០; សារក្នុងចិត្ត, មហោស្រពរូបថតភ្នំពេញលើកទី ១០, វិចិត្រសាលសិល្បៈ ទទឹម, ភ្នំពេញ, ឆ្នាំ ២០១៩; និងសហ (ថ្នាក់ថតរូបសហសម័យ និងឯកសារ) គម្រោងសិល្បៈស-ស, ភ្នំពេញ, ឆ្នាំ ២០១៨ ។