អ៊ូ វណ្ណឌី

អ៊ូ វណ្ណឌី​ (កើត​ឆ្នាំ​១៩៧៧ ក្នុង​ខេត្ត​កណ្តាល) រស់នៅ​ និង​ធ្វើការ​នៅទីក្រុង ​ភ្នំពេញ។ គាត់​បាន​បញ្ចប់ការ​សិក្សា​ផ្នែកចម្លាក់ទំនើបពីសាកលវិទ្យាល័យ​ ភូមិន្ទវិចិត្រសិល្បៈ នៅទីក្រុង​ភ្នំពេញ​ ក្នុងឆ្នាំ ២០០៥ ហើយ​នឹង​ផ្នែក​គរុគោសល្យនៅ វិ​ទ្យាស្ថាន​ជាតិ​អប់រំ ​ក្នុង​ឆ្នាំ​២០០៦។ ចាប់តាំងពី​ឆ្នាំ​២០០៦ ដល់ ២០០៨ គាត់គឺ​ជា​សាស្រ្តចារ្យ​នៅ ​វិទ្យាស្ថានជាតិ​អប់រំ​។ 

វណ្ណឌី​ បាន​ចូលរួម​ក្នុង​គម្រោងសិល្បៈសន្តិភាព​កម្ពុជា​ ពី​ឆ្នាំ​២០០៣ ដល់​ ឆ្នាំ​២០០៥។ នេះ​គឺ​ជា​ឱកាសដំបូង​របស់​គាត់ ​​ក្នុង​ការសិក្សាពី​ការ​ធ្វើ​ស្នាដៃ​ពី​ ចម្លាក់ដែក ផ្សារ និង​ការ​កែច្នៃគ្រាប់​ AK-47 ទៅ​ជា​ស្នាដៃ​សិល្បៈដ៏ស្រស់ស្អាត​បង្ហាញពី​ សន្តិភាព។ គាត់​បានក្លាយជា​សិល្បករកម្ពុជា​ដ៏ល្បីឈ្មោះមួយរូប ដែល​បង្ហាញពី​គោលជំហរដ៏រឹងមាំ ​ក្នុង​ការនាំសារទៅកាន់​សង្គម​តាមរយៈ​ស្នាដៃ​របស់គាត់ដូចជា គម្រោង វីរុស​  HIV ដែល​បង្ហាញពីការ​យល់ដឹង​អំពី​មេរោគអេដស៏ សំរាប់​ យូណេស្កូ និងយូនិសេហ្វ និង គម្រោង UNDP ដើម្បី​អបអរសាទរសមិទ្ធផលក្នុង​សកម្មភាពកំចាត់​មីននៅ​កម្ពុជា ​ឆ្នាំ​ ២០០៩។ ស្នាដៃរចនាវិមានសន្តិភាព​របស់​គាត់ «ស្តេចនាគសំរាប់​សន្តិភាពនិងការអភិវឌ្ឍ»​ ត្រូវបានជ្រើសរើសបង្កើត និងត្រូវបានដាក់ជាអចិន្ត្រៃយ៍ នៅក្នុងទី​ក្រុងបាត់ដំបង ដោយប្រើប្រាស់អាវុធដែលប្រមូលបានពីខេត្តបាត់ដំបង។ ស្នាដៃសិល្បៈរបស់គាត់ត្រូវបានដាក់តាំងបង្ហាញពាសពេញប្រទេសកម្ពុជា នៅប្រទេសអូស្ត្រាលី ឥណ្ឌូនេស៊ី ចក្រភពអង់គ្លេស និងសហរដ្ឋអាមេរិក។